S'identifier Contact Avis
 
34° C
  à Port-au-Prince
Radio Pacific 101.5 fm - En direct
Le Journal Dernière heure Actualité Édito Tribune Société Économie Culture Diaspora Sport rpacific101.5 FM  
× Immobilier Appartements Maisons Locaux commercial Locaux pour Bureau Terrains Véhicules Voitures Camions Tout Terrains Minibus Motos Divers Animaux Articles ménagers Ordinateurs et pièces Équipement électronique Équipement industriel Équipement lourd Diverses études Légal Bijoux et montres Smartphone et tablettes Vêtements Jeux video
Yon latriye « Bonbon siwo » nan pwezi Christ-Falin Oralus

Yon latriye « Bonbon siwo » nan pwezi Christ-Falin Oralus








Depi kèk lane pwezi kreyòl simaye toupatou nan peyi a tankou lodè jasmen nan yon bèl nwit nan mwa davril. Nou paka bliye bèl powèm an kreyòl Felix Morisseau Leroy yo ak Emile Célestin Mégie ak tout rekèy powèm Georges Castera ki pote anpil jèvrin nan literati kreyòl nan peyi Dayiti. Travay Regwoupman Ekriven Kreyòl (REK) yo gen anpil enpotans tou. Nan sans sa, gen yon jèn powèt ki rele Chris Falin Oralus ki mete deyò nan koleksyon Jacques Roumain yon rekèy powèm ki rele « Bonbon siwo ». Se yon ti liv trant wuit paj. Otè a di tout lanmou, tout soufrans la vi a.

Avèk anpil metafò, anpil konparezon ak oksimò sitou, powèt la di sa li santi ak tout sa ki toumante l. Sa ki fè li ri, sa ki fè li kriye. Li di tout sa li santi nan yon langaj ki senp anpil. Ou pa bezwen fè anpil jefò pou rantre nan nannan tèks li yo. « Mizè traka dèt ak dèy se sinonim jwisans. Lè m ap desinen foli nan kuis ou/depi gòsbren parèt tèt li tout mounitè m nan swe kò w, mwen ak ou se penso ak twal nou bay lavi bote nan plamen lanwuit ».

Pou powèt Inema Jeudi, « powèm sa detire nan menm souplès ak lorizon l pran pou riban. Riban senbolik. Riban swa pou mare senti limonite, kote santiman pyafe pòtre lajwa ki pa janm bay tranchman vant. » Lè yon moun ap li pwezi « Bonbon siwo » yo, ou pataje menm jwa ak menm tristès otè a santi. « Peyi a dekonstonbre nan men nou byen mal pachiman yo fè maleng sou do jenou Matisan ». « Bonbon siwo se yon pwezi an tchoutchout k ap donnen etensèl. Chak mo se yon bouke flè ki pa kite pesònn indiferan » men sa powetès Jessica Nazaire di sou livsa ke li pwofite rekomande anpil moun li pou yo onore tèt yo.

« Lè w pala vèb yo malad mo yo an debabdad, twa rivyè koule nan figi m tonbe sou men m pou desinen kòw sou tablo yon rèv ki pap sa bwete ».

Nan « Bonbon siwo », powèt la fè anpil jefò pou pataje yon ti moso nan rèv li ak limanite. Li itilize lank plim li pou li krache tout kolè l ak mepri l lè li gade sa k ap pase nan peyi l. Rèv li se rèv tout moun. Atansyon pou nou pa pran rèv li pou pa nou, paske youn sanble ak lòt. Pwezi « Bonbon siwo » a dous anpil. Li gen anpil sansyalite ladan l. Powèt la rive di tout sa l ap di nan yon lang ki anvi fè moun dòmi pou bliye mizè lavi a.

« Depi m wè w, m wè Pòsali bay bonè lanmen ak de men m/ depi m wè w, m degrennen anndanm sik yo fonn nan vag kò w pote. (…) « Prete m elastik kilòt ou pou sa mare cheve detrès mwen. Kite m pase sou po vant ou pou m ekri yon ti pwezi ki ka mòde sansibilite w. Pou fè m konnen sa ki lakoz mo m yo anbete/ mo yo pèdi bonnanj/ lè w pa la, plim mwen pran kranp/ lè w pa la, lajwa refize m, kòk pa chante, dife pa sanble mwen marande anndan souvni m. »

Christ Falin Oralus fèt nan Bonbadopolis nan lane 1991, « Bonbon siwo » se premye liv li, kote li kite mo yo fè sa yo vle ak li. Rekèy sa montre literati kreyòl la ap bouske pou pi devan san li p ap gade dèyè. Liv sa a montre jefò anpil otè ayisyen ap fè pou yo di pi byen sa yo santi nan yon lang ki kapab di aklè sa yo vle di a san paspouki ni foskote.

Schultz Laurent Junior



Articles connexes


Afficher plus [3710]