S'identifier Contact Avis
 
29° C
  à Port-au-Prince
Radio Pacific 101.5 fm - En direct
Le Journal Dernière heure Actualité Édito Tribune Société Économie Culture Diaspora Sport rpacific101.5 FM  
× Immobilier Appartements Maisons Locaux commercial Locaux pour Bureau Terrains Véhicules Voitures Camions Tout Terrains Minibus Motos Divers Animaux Articles ménagers Ordinateurs et pièces Équipement électronique Équipement industriel Équipement lourd Diverses études Légal Bijoux et montres Smartphone et tablettes Vêtements Jeux video

Premye edisyon Semenn jèn ekriven Kafou

Premye edisyon Semenn jèn ekriven Kafou



Komin Kafou ak zòn ki sou kote li yo ap resevwa de pye fèm soti 21 you rive 27 oktòb 2019 la premyè edisyon "Semenn jèn ekriven Kafou". Yon inisyativ asosyasyon Plume agence littéraire, yon asosyasyon ki espesyalize li nan fè pwomosyon pou literati ak kilti andedan komin sila. Yon inisyativ k ap pèmèt jenn gason ak jenn fanm epi lòt moun nan kominote a jwenn yon espas pou yo twoke lide epi viv yon semenn san parèy pou demele may yo nan yon vil ki plonje ra kou nan latwoublay depi kèk tan.


Se anba tèm « M ap li » oganizè aktivite yo lanse premye edisyon Semenn jenn ekriven Kafou yo ane sa. « M ap li » ki tradui anvan tout bagay yon aksyon k ap dewoule, se an men tan tou yon envitasyon sou yon lòt fòm pou ankouraje timoun, jèn ak granmoun nan kominote a vini patisipe nan gran avanti literè ak kiltirèl sila. Daprè sa Gabynho, kowòdontè aktivite a fè nou konnen, semenn Jèn ekriven Kafou òganize nan objektif non sèlman pou fè pwomosyon pou lekti ak ekriti men divès espas nan komin nan men tou se kreye lyen epi mete limyè sou Jèn ekriven k ap evolye (menmsi li pa t fèt la) nan Kafou.

Aktivite a ki chaje k on legba ap dewoule nan plizyè zòn tankou: Degan, Bwochèt, Wane, Lamanten, Monrepo, Thò, Bizoton ak Dikini avèk yon latriye konferans ak plizyè jèn ekriven tankou: Peter Cenas (lire pour transformer) et Ricot Marc Sony (Autour, livre et éditions), atelye avèk Samuel Taillefer, Floriyo Jean Gregory ak Jean Marc Fleurimond San nou pa bliye expozisyon, vant siyati ak yon aktivite kwaze ant Kafou ak Kwadèboukè. Yon men kontre ki moutre klè k on dlo kòk, literati bay moun k ap pratike li yo, yon sans jenerozite yo pa pèdi menm nan peryòd gwo latwoublay.

Si se vre literati entwodui twoub tankou jan Nicole Caligaris imajine sa, sitiyasyon twoub ki blayi sou komin Kafou pa ta dwe sèvi kòm pretèks pou sispann fè literati kontinye boujonnen. Se pètèt pou rezon sa menm, òganizatè pa gade sou sitiyasyon malouk ki viwonnen nou pou yo prezante kokennchenn aktivite sa ak tout rejyon metwopolitèn nan san distenksyon. Epi pwofite raple nou, nan tout sikonstans nou dwe fè literati olye lòt bagay. Paske menm nan moman difisil yo, toujou gen posiblite pou envante yon latriye Inivè posib.

Pwogram sa k ap dewoule nan lekòl, legliz ak lòt espas rasanbleman jwen sipò divès lòt jèn ekriven k ap viv nan zòn nan. Nou ka site Fredjy Louis, Ricardo Royal, Gabynho, Hervia Dorsinville, William Saint-Cyr, Trujy Judicaëlle Sully ak Emmanuel Alexandre ki deja mete tout yo menm pou fè premye edisyon Semenn jèn ekriven Kafou yo tounen yon evenman k ap make ane sa. Ak Semenn jèn ekriven Kafou, asosyasyon Plume agence littéraire rantre danble nan yon demach pou volorize jèn ekriven k ap evolye nan komin nan. Yon semenn okenn moun pa dwe rate.

Lesly SUCCÈS




Articles connexes


Afficher plus [4172]