S'identifier Contact Avis
 
26.11° C
  à Port-au-Prince
Radio Pacific 101.5 fm - En direct
Le Journal Dernière heure Actualité Édito Tribune Société Économie Culture Diaspora Sport rpacific101.5 FM  
× Immobilier Appartements Maisons Locaux commercial Locaux pour Bureau Terrains Véhicules Voitures Camions Tout Terrains Minibus Motos Divers Animaux Articles ménagers Ordinateurs et pièces Équipement électronique Équipement industriel Équipement lourd Diverses études Légal Bijoux et montres Smartphone et tablettes Vêtements Jeux video
Kite l glise !

Kite l glise !








Nan yon fanmi zafè bon nan vil Gonayiv, gen yon jenn fi ki t ap pouse nan tè wouze. Chanm ak moustikè nan kay chanmòt, bwatdouvraj ki kòmande Pari, abònman womanfoto, anyen pa t twòp pou fè prennsès la plezi. Li te nan tètdelis bon pati ki gen nan vil. Bèl moun, byeneleve ak bon sitiyasyon.

Tout jennjan ap founi je gade, men yo pa fouti sifle manmzèl lè l ap pase. Li pa t ran pèsòn nan kanton an epi li kenbe wòl li. Tan pase epi lè tout moun panse madmwazèl la pral deside l antre nan kouvan, paran l envite lasoyete nan maryaj. Tout moun al dekouvri mari l chwazi a : yon nèg vini, byen kanpe, cheve siwo ki konn byen pale. Depi nan resepsyon maryaj la, manm klèb Rotary gen tan envite l nan reyinyon. Prezidan ekip foutbòl dezinye l gwo sipòtè ki pral chita nan tribin lè gen match.

Maryaj potko byen fin konsonmen lè n dekouvri nan ki pwen mesye marye a te dejwe, dènye mak krakè. Tout dilè djousi, awoze te nan zafè avè l. Lè misye pa gen dekwa pou l peye, se bijou, valiz, soulye madanm lan li pote al mete sou ban lekòl kay dilè.

Yon lè misye leve yon bèl kòb ameriken anba matla bèlmè l. Kòm misye te gen tan twòp pou kay pandan l ap fè pèp Gonayiv rizibe fanmi an, mèt kay la chwazi vann misye nan dyab. Pi gwo sezisman an vini se lè ekspedisyon an fin monte, bòkò avèti si l kontinye pifò moun nan kay la ap pase.

Lavi mesye marye a sove paske lè l te fin vòlè kòb la, li simaye ti monnen on pakèt kote nan kay la. Timoun visye ranmase yo pou achte blad ak piwouli san yo pa t imajine se gwo vòlè yo t ap pwoteje.

Zotobre ki leve lajan Petwokaribe a gen lè te fè menm klas ak entelijan Gonayiv la. Depi koze a pran lari a, depi pawòl kòd la ap pale a, anpil moun vin dekouvri se paravan yo te ye. Fanm ak nèg isit bouke niche kras, beke myèt nan fè tibras pou touye vè nan vant yo. Sa di pou al rann kont pou yon milyon goud pandan patwon an ap klin senkant milyon dola. Gen enjistis tout kote, menm nan klèb piyajè.

Gen moun ki jwenn tikat, moto chinwa, ti piti kontra, sak sinistre, lajan gwòg nan lajan channgo a. Epi bra yon pran nan zip. Gen lòt ki te achte kay aletranje ki kouche sou do ap pran nouvèl Ayisyen k ap jigote sou Radyo Kanada ak Cnn.

Antouka, si katolik di gen gwo peche ak ti peche, pwotestan yo rakonte tout peche se peche. Depi w pa repanti, rakonte lajistis lavi w, se lanfè tèt dwat. Vòldirèk.

Nan kontwole konbyen ti move kou nou kite pase pou n kite moun viv, pou n kite peyi a mache, pou n pa viktim, pou n pa sanble louzè, li posib pou nou bonjan konplis.

Nou pa p met menm nan dife pou pèsòn. Dayè, ak kisa pou n kontinye bay vòlè ak kriminèl lanmen? Se yo n genyen. Nou tout se abitan yon peyi ki konstwi epi fonksyone sou bras.

Senkant kòb nan mache Kwabosal. Degouden nan makèt Petyonvil. Kite l glise !

Jean-Euphèle Milcé



Articles connexes


Afficher plus [3251]