Kaye No7 Powèm Nasyonal la chante louwanj tout Tyovi k ap grandi anba bab mayi Leta. Tout kò kaye a pote mak kri timoun inosan, se yon veritab litani lirik kri k ap remanbre konsyans, deboutonnen move pratik matchis, sosyalis malis jouk Ayiti pran yon souf nan tèt, nan tèt tout Tyovi.
(...)
Sizanka pa ka
Koulin pa grandizè
Mama boulaye zèl papiyon tranpe nan lanp tèt gridap
Sou rit yon kata asòtò
Ewanoulaye katchapika pike kè
Tanbourele lanmou sèl ka
Travèse dife san flanbe vivans...
Gregphile
Pa janm bliye kaye sila se yon zouti pou devlopman mantal. Kaye sa pibliye pou jayi lanmou ak byennèt toupatou sou teritwa nasyonal la ak lòt bò dlo.
Powèm Nasyonal yon inisyativ powèt Wilkens Scott Fifi ak jounalis powèt Godson Moulite, Philippeson Juste (powèt - dizè), Jean Grégory Floriyo (powèt), Stéphanie Boursiquot (powetès) pote pou ou ansannm ak lòt kolaboratè tankou Dawinson Saint Charles aka Malab'art (Grafis), Wismy Faustin (Atis Pent) ak Le National.
POWÈM SOSYAL
1
okenn nan nou
pa konnen ki mò lanperè mouri
oubyen kilè kòd la kase
kiyès ki koupe l
ki fè jodi a nou la
okenn nan nou
pa konnen ki kantite wòch
k ap tire anndan vant lespwa
ki depi twa jou
vale dlo bouch li
depi yon moman
m ap obsève tou prè an
gen yon mòso lapawoli
k ap preche andidan trip mwen
"Byennèt pou tout moun"
ki sanble tèt koupe
ak levanjil Sen Jan Batis la
men pa gen youn nan nou
ni Pyè ni Jak ni mwen
ki te janm vle lonje kou l
byennèt pou trip
trip pou byennèt
menmsi fwa n boule
pa gen monte pa gen desann
sa k ap pase andidan m lan
sèl mwen ki konnen l
Bondye pa zanmi m
lari Pòtoprens koulè bouch mwen
Ansky Hilaire
Yogann / Ayiti
2
TAS MABI
Kakawo
Kafe
Koton
Kann pou kann
ESKLAV se chen
Mande kòd nwa
Zandolit mouri inosan
Pa gen dekwa pou tanbou bat
Ayisyen rete ak men nan tèt
Pa gen dekwa pou lanbi kònen
Pèp la pèdi souf
Pa gen dekwa pou limyè limen
Tout bagay tenyen
Gras lamizèrikòd gen ren
Gen powèm sa a
Se yon kri tankou vètyè a
An n kòmanse konte pòz jouk zetwal
vann Pòtoprens bay lisifè
Jou Fon Kochon wè limyè
Tonmtonm ap fè kenken
Nan fèt pale
Tou 2004 ap rejwi
Mèt Vèb
Pòtoprens / Ayiti
3
KITE M ALE
Mwen
M bouke pote kè m labatwa kou mouton
Nan twoke lwayote patriyòt pou koupyon.
Chak jou konsyans mwen pran chaplet
Nan gad yon pakèt ti sen leta ap woule tete san chaplè.
M te deja konn Pòtoprens pa legliz
Pa te janm gen antre priye vre
Alèkile menm sòti n paka sòti
Chak blòk gen yon mèt beton epi tout katye make ademoli
Plen pastè nan vil la k antre nan mason
Jis pou konstui kapital li.
Se bandi k ap brandi etanda
Sa k anlè pa desann e tout sa k desann ret anba.
M fini pa konprann viv alèz isit se yon mit
Se yon krache nan pise pou kenbe fòs
Se yon radyo san frekans n ap chanje pòs.
Kite m m ale
Paske rèv mwen yo pran devan m lontan sa
M te vle vin medsen
Men ministè sante piblik vin yon bagay prive
M te vle vin avoka
Men paran m plede koupab paske yo fè m an ayiti
M te vle vin powèt
Men m p ap gen lalwa djòl mwen
Anderson Iliodain
Pwèlto Plata / Repiblik Dominiken
4
Ti twou envizib / ti twou lib
Ti twou plen van / plen lè
Reyalite n bwafouye
Ti twou nan sèvèl
Ti twou nan lespri
Mantalite n ti twou
Ti twou n pote mak ti klou
Ti twou nan tè
Ti twou nan bè
Kras kò n plen ti twou n
Tik tak
Ti gout dlo nan fwon
Chak gout lapli se yon ti twou nan lavi n
Wilkens Scott Fifi
Knoxville Tennessee / Etazini
5
Pòtoprens
Letènite nan bwadchenn
Silans powèm nan ilistre ochan
Gen jou ki pase nan fil kasèt
Genyen tou se klou gagit
Lè tout nuit met maleng sou pwent lang tchyovi
Gen segond ki pa konte
Gen alam ki bliye kriye
Nan kreye pa pou kalvè
Grangou badijonnen n
Nan kalfou Kat chimen
Pòtoprens
Letènite nan bwadchenn.
Wismy Faustin
Meksiko / Meksik
POWÈM SANTIMANTAL
1
m ap kouri dèyè bri a
k al chwe anba tèt ou kòmè
se nan très cheve w
m koute dènye son twonpèt la
toumant ou menm
ap pwonmennen nan lespri m tankou yon rès melodi sou tab mache anba
douvanjou
tout kòk yo fè konplo ak pipirit
se dousè serenad sa menm
ki fè loraj yo pran gwonde nan je w
kòmè menm dlo je w pran lapenn
Ansky Hilaire
Yogann / Ayiti
2
YON LÒT LÈT
M ekri w ak sant kò w mare nan lespri m
tankou yon pèleren k ap travèse kanpanyòl
m konte yon dividal priyè
pou lèt la rive nan plan men w
M ekri w pou di w
pa gen gouyad
ni okenn lòt powèm
nan lespri m
se kò w ki abite m
Nan dènye bretèl wòb lèt la
m kriye tankou lwa
ki pa jwenn manje nan dans Lakou Soukri
Cheri
tounen
jodi a syèl la bezwen saliv nou kwaze
pou lapli tonbe meteye
Mèt Vèb
Pòtoprens / Ayiti
3
PINGA
Sonje m pa yon arivis nan lanmou vre
menm lè ou wè kè m prèlovan.
Si m kite ou jòfre mezi safte ou
degòbye sou inosans mwen
pa panse ou ka trete m kou rapò si
jou lasosyete fè endijesyon.
Lè ou wè foli m ap make pa
sonje renmen se samba
sonje gen kite k fini de pye devan.
Kidonk cheri
kontinye tchwe tan
fè laviwonndede ak bonnanj mwen
jouk ou ban m pote non èks ou.
Men sonje
si yon jou n ta sispann konstui paradi n
m pral met dife nan lanfè
gran lanjounen sou non ou.
Anderson Iliodain
Pwèlto Plata / Repiblik Dominiken
4
Yon petal flè m pote pou ou
Pou m raple ou
Pi bèl pase sa lèzòm te fè kwè
Yon gout lawouze douvan jou sifi
Pou lavi ouvè ankè
limit lamizè degaje enèji filozofi an daki
Jouk Ayiti anbeli ak rèv tout pipirit
Yon petal flè m keyi sou non w
fèmen je w pran twa segonn pou reflechi
Sou lavi w / sou lavi m
Tout sa w wè nou ka fè ak chalè kò n
Ebyen yo posib
Ak yon sèl ti petal flè k pran priz nan bèlte w
Wilkens Scott Fifi
Knoxville Tennessee / Etazini
5
Lè w gade m
sole a blèm ak revè
nan tann souri w
fè mikalaw ak flè dizè
lè w gade m
plim sou po m fè koudjay
nan kadans po bouch ou
Di m
Di m non cheri
Di m kouman moun al nan lanfè
si lonbray ou se pòt pou paradi.
Wismy Faustin
Meksiko / Meksik
Prezante pa: Wilkens Scott Fifi ak Godson Moulite
