Pou mwen ak ou
depi depi :
Jou ak Mo pa te janm menm.
Chak jou gen mo li
Chak mo chwazi jou li.
Jou te toujou pi long
Mo, li, pa t sispann kout.
Gen jou menm mo vin kout nèt
Jis nou pa jwenn mo pou di ki jou li ye.
Jou nouvèl la rive
M pa jwenn mo pou m rakonte lapenn mwen
M pa jwenn mo pou m kache soufrans mwen
M pa jwenn mo pou m dekri longè rèl mwen.
Se jou w !
Se rèl mwen !
Jou nouvèl la rive
Tout mo delala
Tout mo annanfans
Tout mo penyen lage
Jouk lapenn monte dezabiye pòpyè m,
gwo jounen.
Se jou w !
Se rèl mwen !
Plis jou a ap fofile
Plis mo yo ap tenyen.
Plis w ap deplase
Plis m ap dekouvri
Se vre
Gen jou k pi long pase lavi.
Jou zanmitay nou te toujou pi long toujou.
Li te toujou pi bòzò, pi chèlbè, pi bèl
nan rakonte listwa
nan fè listwa.
Ak tout kè nou.
Pafwa se sou pwent nen yon zegwi
Souvan se anba chalè dife malè pandye.
Jou lamitye pa m ak ou
Tann nat li tann jou leve.
Gen mo ki pi kout pase lanmò.
Mo pa nou te toujou pi kout toujou
Li te toujou pi senp, pi presi, pi klè
nan kare lide
nan pran pozisyon
anfas lanmò.
Mo nou te toujou lonnen
nan mezirèt KONBA nou
Jouk nou fè lèlmi
Jouk fwonmi pike nou nan do.
Jou tankou jodi a
Se jou k pote rèl
Jou tankou jodi a
Se jou mo k pi kout :
Mwen damou w, Kanmarad, Tibob!
Sonson: 3-03-2022