RTPacific Contact Avis
 
26.23° C
  à Port-au-Prince
Radio Pacific 101.5 fm - En direct
Le Journal Dernière heure Actualité Édito Tribune Société Économie Culture Diaspora Sport rpacific101.5 FM  
× Immobilier Appartements Maisons Locaux commercial Locaux pour Bureau Terrains Véhicules Voitures Camions Tout Terrains Minibus Motos Divers Animaux Articles ménagers Ordinateurs et pièces Équipement électronique Équipement industriel Équipement lourd Diverses études Légal Bijoux et montres Smartphone et tablettes Vêtements Jeux video

Omaj pou akademisyen Ernst Mirville

Omaj pou akademisyen Ernst Mirville



Anpil enstitisyon an Ayiti tankou lot bò dlo rann omaj ak akademisyen Ernst Mirville ki fè vwal pou peyi san chapo. Akademi kreyòl ayisyen ( AKA), Festival literati kreyòl ak Tanbou literè wete chapo yo byen ba pou salye depa potorik gason sila a ki travay anpil pou pouse lang manman an pi devan.

Pou AKA « Travay doktè Ernst Mirville fè nan pwomosyon lang kreyòl la touche plizyè domèn tankou : edikasyon, literati, kilti… Doktè Mirville, yo konnen li sou non Pyè Banbou, se manm fondatè Mouvman kreyòl (1965) ki pral vin akouche Sosyete koukouy. Akademisyen Mirville te profesè nan plizyè inivèsite tankou, Université d'Etat d’Haïti (UEH) au Université polyvalente d’Haïti (UPH). Li se otè plizyè liv li ekri an kreyòl epi sou kreyòl. Parmi yo nou ka site : Tim-tim, Rechèch, Deviz, Element de lexicographie bilingue : créole-français, Grammaire créole comparée.

Doktè Mirville se yon teyorisyen ki pote patènite nosyon Oraliti pou pale de literati oral nan lang kreyòl. Travay vanyan gason sa dwe rete vivan pou sèvi plizyè jenerasyon.

Akademi kreyòl ayisyen (AKA) pèdi yon bibliyotèk, yon mapou, yon patriyach. »

Festival entènasyonal literati kreyòl wete chapol byen ba pou salye travay akademisyen Mirville te fè sou lang manman an « Travay ak angajman Doktè Ernst Mirville pou fè pwomosyon epi defann syantifikman lang kreyòl la plase li nan lis entèlèktyèl ki plis make istwa lang kreyòl la pandan 20e syèk la pou debouche sou 21e la. Nan yon lèt li te ekri Doktè Jean Price Mars nan dat 15 mas 1966, li te menm gentan prevwa yon « Festival International Kreyòl » nan Karayib la.

Nan moman tristès sa a, Festival entènasyonal literati kreyòl swete fanmi ak zanmi potorik la, Sosyete koukouy, Tanbou literè, Akademi kreyòl ayisyen, tout enstitisyon ak tout moun dèy sila a afekte, bon kouraj ! Fòs ! Lanmò s on peyi n bliye k ap mache anndan nou chak ! »

Nan yon nòt Fakilte lengwistik aplike mete deyo, dekana a di li aprann avèk anpil tristès lanmò akademisyen Ernst Mirville « Doktè Ernst Mirville te yon pwòch FLA e li te anseye nan Inivèsite d Eta d Ayiti (nan fakilte Etnoloji)

Fakilte a koube li byen ba pou salye depa gran mapou sa a e li prezante senpati li bay fanmi, zanmi ak kòlèg Doktè Mirville, an patikilye, kòlèg li nan Akademi kreyòl ayisyen e nan Sosyete koukouy. »

Tanbou literè ki se yon gwo asosyasyon trè pwòch Doktè Ernst Mirville, fè soti yon nòt pou koube l devan lanmò « gran nanm » nan.

« Tanbou literè aprann ak anpil tristès lanmò Doktè Ernst Mirville nan dat 8 jen 2021 an nan aswè. Travay nanm vanyan sa a pou pouse lang kreyòl la pi devan pa gen bòn. Se yonn nan rezon ki fè an 2018 Tanbou literè te prepare dosye l pou li te vini manm Akademi kreyòl ayisyen.

Ekriven, antwopososyològ, lenguis, Dòk Mirville fèt Pòtoprens 30 jiyè 1940. Tout ekip Tanbou literè a yon lòt fwa ankò ap swete w bon travèse gran nanm »

Schultz Laurent Junior




Articles connexes


Afficher plus [5613]