Idantite k ap pote n nan s on frètkach
Yon demen ki ble depi opa
Yon lòt sans ki pran fòm nan sa n reve
Pinga pèsonn bliye gen yon lang k ap lanmbe foli n
Men ane 1965 pa te konnen si lannuit te gen vwa pa l
Tonton Makout tchake ond lan an miyèt moso
Duvalier ri nan nen
Fòdimanch kale dan l
Yon pil zetwal l ap chache
Fòdimanch foure men l nan yon powèm
Zo melanje ak vyann
Tout sa n pa di se pou listwa
Jan Mapou yon jan mal pou l bliye kout grif selil yo
Twa mwa pèdi davans
Yon epòk loray vale
Nou kriye mezi sa n pa konnen
Jan Tanbou je kreve
Koupe sa
Pataje l
Gen yon nanm ki etenn pou yon lang
Pyè Banbou pase nan yon chalimo
Menm jou yo sezi
Idalina la toujou ap keyi sa l bliye
Lasosyete
Sonje
Mouvman Kreyòl Ayisyen ap mache toujou ak yon solèy nan plamen l
58 bouji nan vwa l
Yon mizik plengrennen
Yon vwayaj kilti ap mezire
Yon milyon koukouyèt
Yon rado limyè tout koulè
Tout doulè
Tout pou n wè avan lari fè fraz
Mande kouzin Pascale si dans lan mi sou pye
Mezanmi
Di Sosyete Koukouy pou mwen Depi l tande zetwal yo mi
Gen yon peyi ki pral chante
Pou kontinye klere nan fè nwa...
Iléus PAPILLON