Powèm Nasyonal kaye No5 la preche lanmou ak lapè, yon latriye vapè mo melanje ak yon pil pousyè lirik majè ki soti nan kat kwen latè vin blayi tout longè nan jounal Le National, jouk nanchon an rive wè ak je pa yo, yon je kreyòl.
" Jodi a Zo bouki bouke
Zotobre ak zomalere bouke
Zotorite pa jwenn okenn zo pou souse
Gen zan depi tout zo n fè poud / zanpoud
Peyi a yon blòk zokokobe / san chè
Pwezi a pran chè pou l di
Zo bouki bouke "
(WSF)
Pa janm bliye kaye sila se yon zouti pou devlopman mantal, sosyal. Kaye sa pibliye pou jayi lanmou ak byennèt toupatou sou teritwa nasyonal la ak lòt bò dlo.
Powèm Nasyonal yon inisyativ powèt Wilkens Scott Fifi ak jounalis powèt Godson Moulite, Philippeson Juste (powèt - dizè), Jean Grégory Floriyo (powèt), Stéphanie Boursiquot (powetès) pote pou ou ansannm ak lòt kolabaratè tankou Darwinson Malab'art (Grafis), Tètpwav Solèy (Atis Pent) ak Le National.
POWÈM SOSYAL
1-
M danse m layite
M monte desann anba fouk lavi
Nan kwòk janm mati
Avèk raj nan mitan tray
M voye reyon doulè dèyè
Epi m vire tounen k on toupi
Se pa de gouye m pa gouye
Anba move tan move van
Van sakad / Van bourad / Van baflad
Van ki pa kanmarad tònad
Twòkèt pwoblèm yo tonbe
Pwofitè tanmen ranmase rivyè dlo je
Dlo sale tounen dlo digo san ble
Pentire k on tablo syèl
Pou vegle anbelisman je
K ap gade
Pommier Juvencia (Juju)
St-Michel de l'Attalaye / Ayiti
2-
Ban m pran san m
bay powèm nan bwè
tankou lèt m ap ekri bay rigòl
sou non repozwa n
Fent lank wouj k ap koule a
fè tèt woule
k on sèk san gidon
zòn nan zòn / moun nan moun
riyèl ap kouri nan rèl
Yon epidemi vil
k ap estènen san
nan jwe kachkach a malèt
emosyon reve dwa met koulè nan langay
Leta drive dwa met doulè sou lang nou
pawòl nou wouj rive nan tout babin
n ap respire anba ti vant
Chè n fè plizyè ti kal
epi tounen tapi zam /tapi bòt
rèv nou sou kle nan twou rego
ban m prese ba n goute
yon powèm madichon demi kuit
paske
pita zam / pita bòt
Lorskenson Alexandre (Lòs Tizplim)
Leyogàn / Ayiti
3-
LESPWA
an penpan
mwen wè yon syèl
tout koulè
kote lapli ap frennen limyè wouj
mwen tande nwa sou blan
vwa timoun yo k ap janbe lari
pou jwe tolalito ak lakansyèl.
demen
tout ekran ki souri
pwojte lavi k ap marye
yon peyi
k ap pran souf anndan flè
lè papiyon douvanjou
fè solèy aplodi van lespwa.
Obdiel Zidane Dormélus
Salisbury, Maryland / Etazini
4-
Nou chita ansanm sou do solèy
Kòmansman maten an chifonnen n
Pataje souf nou / doulè n / limyè n
Nan mitan zam k ap layite soufrans li sou foli n
Tout kote
Mwen wè refleksyon w nan je mizè m
Kè ayiti
Se yon tchè nou tout ka pwoteje
Menm si chimen lavi a fache
Nou rete moutre youn lòt kouman pou mache
Menm si lari a gen chay
Nou pote yon lòt sou zepòl an nou
Nou mete je n ansanm sou yon lavil ak doulè
Kò m se kò w / kè m se kè w / peyi m san nanm
An n sove Ayiti !
Godson Moulite
Pòtoprens / Ayiti
5-
M AP EKRI YON POWÈM BAL
M ap ekri yon powèm bal
Yon rafal
Sou lesyèl ki pa paradi.
M ap vomi yon powèm bal
Nan wonn nan.
Pèp la
L piye / L piye
Alafen l rekolte masak.
Depi lè zam pa pot bannvant
Nan pwen bal ki mouri toufe
Lari, yon tonm djòl ouvè
K ap baye sou bout vyann nan van.
Dlo je k pou di w bouke flè pa gen drapo
Dlo je k pou di w nan doulè dra blan tire pa gen eskiz
Dlo je k pou di w tout gachèt siyen lavi k tonbe fas ba.
Yon lagrèl vè lòsenn
Sou pòv k ap tonbe nan plas povrete
Sou chagren k ap touse moustach li
Sou lafimen sou lafanmi.
M brake yon powèm gwo kalib
Pa ret plas pou lanmè kache.
Litainé Laguerre
Pòtoprens / Ayiti
POWÈM SANTIMANTAL
1-
Loray gwonde ba n
Kè sote
Jouk n al refijye n anba kabann
Men nan men de je kontre
Kè n fè miyèt mòso
File bagèt majik ou
Pou m we si ke m p ap rete
Pase kap voum ou pou m demare
M anvi wè si sansasyon men w
Ka fè kap pawaze nan van
Fè m al pèdi anba touf bwa
Fè m inonde
Jouk dlo desann bwote m ale
Fè w bande de tchatcha nan men m
Ak tòkèt gouyad mwen anvlope anba zesèl
Nan bann Leyogàn ou
M tankou yon silabè dore pye atè
Kou yon majòjon
W ap fè m monte lesyèl pa do
Pommier Juvencia (Juju)
St-Michel de l'Attalaye / Ayiti
2-
Syèl la ap desann vin chèche
2 mòso priyè mirak nan kòsay ou
nou gentan anndan mòn ap jouke dlo
pote pou kannal
Se sou jaden pa w
solèy mwen pi klere
mennen tout ti jou kò w nan limyè a
epi donnen / donnen bo sou po m
donnen ba pou timoun keyi lespwa sou sen w
pi piti yo a pran elan sou sant ou
Tout pasyan met linèt
pou gad lalin k ap kobi kò l nan chache jòf
jouk li sou
fanm eklips
se pou pye lalin glise
pou ri w ka desann atè isi
Lorskenson Alexandre (Lòs Tizplim)
Leyogàn / Ayiti
3-
WOULIBÈ
se nan pla men m
gras matine w pran fò m
se la tou m dekouvri
lè pye w louvri
fetay debraye
lonnvi vegle je solèy
lè kò w degoute
latè mache tèt anlè
m jalou lè w pipi atè
cheri
ki pye pou m leve
lè w chita sou mwen ?
vini non
kite senti w kadanse
glise desann
m ap pran woulib jan w mache
Obdiel Zidane Dormélus
Salisbury, Maryland / Etazini
4-
Souf mwen mouri anba zèl mango mi
Lè lapli tonbe sou tèt
Kò m fè pidetwal tanmen lasisin
Nan je ou
Mwen wè limyè zetwal ki klere kè m
Chak nuit an janm de bwa
Pa kite m sèl sou zile lanmou
Nan pye bwa kay nou
Fè yon tonèl
Kote tchè m va repoze
Pami flè k ap danse bon van
An n suiv chimen lanmou ansanm
N ap kite flè yo pale pou nou
Epi tout rèv reyalize
Lè kè n bat nan yon sèl lo
Godson Moulite
Pòtoprens / Ayiti
5-
REVE
Jou m a konn konte
M a konte konbyen silab
Ki separe
Kò
Ak libète kò
Konbyen awondi
Ki bay chif pwent tete
Se jou m a konn konte
M a di w san silabè
M pa regrèt bouton kòsaj pi dous
Pase grenn madjòk
Litainé Laguerre
Pòtoprens / Ayiti
Prezante pa
Wilkens Scott FIFI
Godson MOULITE
KOREKSYON TÈKS
Philippeson JUSTE ( Mapou lib e libè )
Stéphanie BOURSIQUOT
INISYATIV
Wilkens Scott FIFI
Godson MOULITE
POWÈT PIBLIYE
Pommier Juvencia (Juju)
Lorskenson Alexandre (Lòs Tizplim)
Obdiel Zidane Dormélus
Godson Moulite
Litainé Laguerre
