Bèl ti dyaman nwa
ki sòti nan tè Danakil
Sèz prentan potko franchi
pa pòt lavi w
Lè vye blan devègonde
te pran plezi ap neye sans ou
ak anizèt, wiski
pandan lafimen t ap jwe marèl
pou kache lapèn nan je w
nan yon bwatdenwi
nan Kasablannka
Lannwit lan t ap senyen
gout pa gout
tout degoutans li
nan bouch fenèt kwense a
li t ap senyen
jous nan manto kavalye sòlda
kleren te klouwe sou chèz nan ba a
epi min nan fwon nwit lan
t ap desinen lòt bò a
jous sou tèt dezè a
move kochma tèt chaje
afwontman ak chas a lòm
defèt yo epi viktwa yo
Yon nwit revèy te gen vant kòde
nwit ki pa t pi long pase yon bat je
nan fènwa depi digdantan
k ap souse san ak swè solèy Lafrik
Tristès te tèlman sele syèl ou
menm rit dans ou te vin sale
afòs batman kè w t ap naje ladann
Sa te fè lalin pèdi wout kè m
tankou melodi lavi w ki pèdi koulè
tankou kouran flèv kalamite
ki t ap chache pasaj nan je w
lè je w jwenn wout je pa m
epi makonnen ak nanm mwen
Je w te gen bri rèl peyi aprè peyi
tèlman 2 je w te plen peyi
lè m te gade w
nan tout longè powèm san tit
nwit lan t ap ekri sou liy figi w
m te ka wè
raj yon ras lè kout ri sinik zòt
ap chire po tanbou Lafrik
boulvèsman katye moun nwa yo
lèsen lezanj bliye nan vil Lond
bòdèl nan Tripoli
nan Monmat, nan Alèm
tout bèl paradi krizokal
kote nèg ap danse mizè yo
kote nèg ap chante yon nòt
ki depaman de sa k nan kè yo
jous pou yo ka bay kolon plezi
Gran kri detrès dezè Danakil
Kote sechrès ap donnen dezespwa
Kri anmwey sekou w te kamoufle
nan tout jès 2 men nwa w yo t ap mime
te pote nan kadans dans ou
yon emosyon san tach
tankou premye souri ti bebe
epi chavire ti kè w
ak menm santiman
ki souvan travèse kè anpil nèg
Pandan lafimen t ap viwonnen
anndan an
2 ti bra tou flengen w yo
te anvi trangle e fè disparèt
plizyè syèk ògèy
ak kèk kilomèt peyizaj
pandan chema pye w
sou mozayik byen limen an
t ap chèche soukous
ak ti wout dekoupe
ki louvri sou chapit anfans ou
Fenèt la te louvri janm li
sou Loksidan gran lalwèt
San fwa kè w te pase ladann
San fwa bèl woz wouj la
ou t ap balanse nan ti dwèt ou
t ap reve fè bèbèl
sou fasad pòt vilaj
kote lonbrit ou tere
Boukan soufrans ak van nostalji
ki tatwe sou tout miwa nanm ou
te tankou yon gwo liv ki louvri
devan je pil banbochè yo
Maren ki te sou mannigèt
sòlda ki t ap boule konje yo
touris aryennafè
ki t ap lonnen plezi
nan 2 sen doubout ou yo
kèk misyonè ak foul la
malgre lachte ki te vlope kè yo
t ap tante kèk fwa
dekoupe larivyè touman w
avan lavalas te franchi pòt vizaj ou
Men se sèl ou menm ki konnen
bèl ti fanm Danakil
menm lè nwasè lannwit
anfoudwaye rèv ou
anndan bwatdenwi nan Kasablannka
kè w pa lwen pou l pete pòt
pou w al banbile nan lakontantman
lè douvanjou va kouve lòt lawouze
pou benyen dezè zansèt yo
e ou va retounen nan bitasyon w
ou va retounen pou w danse
pou ewo w yo ki travèse deja
pou ewo w yo k ap bouske lavi
pou ewo Lafrik gen pou kale
Chak pa w yo
jès ou yo
limyè je w
melodi w
ap gen pou di larenn Sole :
tè sa a
tè sa w ap gade la a
tè sa se fout kinnan m tande
Powèm : Nedje
Otè : Roussan Camille
(Casablanca, avril 1940)
Tradiksyon Kreyòl : Mingolove Romain