« Lang kreyòl ayisyen an yon zouti pou devlopmandirab »

Selebrasyon 42yèm jounen entènasyonal lang ak kilti kreyòl te rive fèt jou ki te 26 oktòb 2023. Manm nan AKA yo di se ak anpil lakontantman  y ap selebre jou sila a. Yo di tout y ap goumen pou lang kreyòl la kanpe pi djanm menm jan ak tout lòt lang  ki gen sou latè. Pou Akademisyen yo tout lang se lang. Yo pwofite remesye tout enstitisyon nan peyi a ki bay lang kreyòl la vrè plas li anndan sosyete nou an. « Lang kreyòl ayisyen, yon zouti pou devlopman dirab», se te pi bon fason li te ka sansibilize tout sektè nasyon an sou wòl chak enstitisyon  nan peyi a dwe jwe pou nasyon nou an rive jwenn chemen devlopman tout bon. Atravè tèm sila  a. AK A pwofite anonse tou Gran Pri woman Emile Celestin Mégie yon yo gwo ekriven ki travay anpil pou voye lang kreyòl la monte pi wo. Yo te tou pwofite prezante dezyèm rezolisyon nan lang kreyòl la. Le National  pibliye pou lektè li yo tout diskou prezidan AKA a te fè nan okazyon sila a .

« Akademi Kreyòl Ayisyen pa gen mo egzat pou li tradui lajwa kontantman ki ap bouyi nan venn chak manm li yo, ansanm ak chak antite nan enstitisyon an pou fason nou reponn envitasyon pou nou selebre 42yèm jounen entènasyonal lang ak Kilti kreyòl la. Se vre, selebrasyon jounen an se pou 28 oktòb, men AKA chwazi jounen 26 oktòb la pou selebrasyon ofisyèl la.

Mesyedam, nan vwa pa mwen, tout 42 manm Konsèy Akademisyen an, tout 7 manm Konsèy Administrasyon an, tout manm Konsèy Konsiltatif yo ansanm ak tout anplwaye Sekretarya Egzekitif Akademi an, di nou, nou kontan prezans nou.  Seremoni jodi a, se okazyon pou AKA pote kole avèk tout pèp kreyolofòn sou latè beni, espesyalman popilasyon ki pataje yon lang kreyòl baz leksikal fransè. Se okazyon tou pou AKA vini raple kominote kreyolofòn yo yon jou gen pou rive kote lang kreyòl nou yo va soti nan sitiyasyon minorite pou yo monte chita nan menm ran ak tout lòt mega lang ki egziste yo. Sa ap fèt toutbon, paske AKA genyen konviksyon sa a : Tout lang se lang. Pa gen lang pase lang.